(1)

Tá trédhearcacht fíor-riachtanach maidir le dea-fheidhmiú an mhargaidh inmheánaigh. Ina theachtaireachtaí uaidh an 27 Deireadh Fómhair 2015 dar teideal Commission Work Programme 2016 - No time for business as usual [Clár Oibre an Choimisiúin do 2016 – Ní rogha a thuilleadh gnó mar is gnách] agus an 16 Nollaig 2014 dar teideal Commission Work Programme 2015 - A New Start [Clár Oibre an Choimisiúin do 2015 – Tús Nua], shainaithin an Coimisiún mar thosaíocht gur gá freagairt ar ghlao ó shaoránaigh an Aontais ar chothroime agus ar thrédhearcacht agus gur gá don Aontas gníomhú mar shamhail tagartha don domhan. Tá sé fíor-riachtanach go gcuirfear cómhalartacht idir iomaitheoirí san áireamh sna hiarrachtaí chun trédhearcacht níos fearr a bhaint amach.

(2)

Sa rún uaithi an 26 Márta 2019 (3), leag Parlaimint na hEorpa béim ar an ngá atá le tuairisciú poiblí uaillmhianach de réir tíre mar uirlis chun trédhearcacht chorparáideach a mhéadú agus chun grinnscrúdú poiblí a fheabhsú. I gcomhthráth leis an obair atá déanta ag an gComhairle chun seachaint cánach ioncaim corparáidí a chomhrac, is gá feabhas a chur ar an ngrinnscrúdú poiblí a dhéantar ar chánacha ioncaim corparáideacha atá le híoc ag gnóthais ilnáisiúnta i mbun gníomhaíochtaí san Aontas, chun trédhearcacht agus freagracht chorparáideach a chothú tuilleadh, agus, ar an gcaoi sin, rannchuidiú le leas ár sochaithe. Is gá foráil a dhéanamh do ghrinnscrúdú den sórt sin freisin chun díospóireacht phoiblí níos eolaí a chur chun cinn, go háirithe maidir le leibhéal comhlíonta cánach gnóthas ilnáisiúnta áirithe atá gníomhach san Aontas agus maidir leis an tionchar atá ag comhlíontacht cánach ar an bhfíorgheilleagar. Is ar mhaithe leis an leas eacnamaíoch ginearálta a bheadh sé freisin rialacha coiteanna a leagan síos maidir le trédhearcacht cánach ioncaim corparáidí, trí fhoráil a dhéanamh maidir le coimircí coibhéiseacha ar fud an Aontais chun infheisteoirí, creidiúnaithe agus tríú páirtithe eile i gcoitinne a chosaint, agus ar an gcaoi sin, rannchuidiú le muinín shaoránaigh an Aontais a fháil ar ais maidir le cothroime na gcóras cánach náisiúnta. Is féidir an grinnscrúdú poiblí sin a bhaint amach trí bhíthin tuarascáil maidir le faisnéis faoi cháin ioncaim, gan beann ar an áit ina bhfuil máthairghnóthas deiridh an ghrúpa ilnáisiúnta bunaithe.

(3)

Maidir le tuairisciú poiblí de réir tíre, is uirlis éifeachtúil iomchuí é chun trédhearcacht a mhéadú i ndáil le gníomhaíochtaí gnóthas ilnáisiúnta, agus chun cur ar chumas an phobail measúnú a dhéanamh ar thionchar na ngníomhaíochtaí sin ar an bhfíorgheilleagar. Cuireann sé feabhas freisin ar chumas scairshealbhóirí meastóireacht a dhéanamh i gceart ar na rioscaí a ghlacann gnóthais, déantar straitéisí infheistíochta atá bunaithe ar fhaisnéis chruinn mar thoradh air agus cuireann sé feabhas ar chumas cinnteoirí measúnú a dhéanamh ar éifeachtúlacht agus ar thionchar na reachtaíochta náisiúnta. Ba cheart grinnscrúdú poiblí a dhéanamh gan dochar a dhéanamh don timpeallacht infheistíochta san Aontas ná d’iomaíochas ghnóthais an Aontais, lena n-áirítear gnóthais bheaga agus mheánmhéide dá bhforáiltear i dTreoir 2013/34/CE ó Pharlaimint na hEorpa agus ón gComhairle (4).

(4)

Is dócha freisin go mbeidh tionchar dearfach ag tuairisciú poiblí de réir tíre ar chearta fostaithe maidir le faisnéis agus comhairliúchán dá bhforáiltear i dTreoir 2002/14/CE ó Pharlaimint na hEorpa agus ón gComhairle (5) agus, trí eolas a mhéadú ar ghníomhaíochtaí gnóthas, ar cháilíocht an idirphlé a tharlaíonn laistigh de ghnóthais.

(5)

Mar thoradh ar chonclúidí na Comhairle an 22 Bealtaine 2013, tugadh clásal athbhreithnithe isteach i dTreoir 2013/34/AE. Leis an gclásal athbhreithnithe sin, ceanglaíodh ar an gCoimisiún féachaint an bhféadfaí oibleagáid a chur ar ghnóthais mhóra in earnálacha breise tionscail tuarascáil de réir tíre a dhéanamh ar bhonn bliantúil, agus na forbairtí san Eagraíocht um Chomhar agus Forbairt Eacnamaíochta agus na torthaí ar thionscnaimh Eorpacha ghaolmhara á gcur san áireamh.

(6)

Tá tuairisciú poiblí de réir tíre tugtha isteach ag an Aontas cheana don earnáil bhaincéireachta le Treoir 2013/36/AE ó Pharlaimint na hEorpa agus ón gComhairle (6) agus don earnáil eastóscach agus lománaíochta le Treoir 2013/34/AE.

(7)

Le tuairisciú poiblí de réir tíre a thabhairt isteach leis an Treoir seo, tagann an tAontas chun bheith ina cheannaire domhanda i gcur chun cinn na trédhearcachta airgeadais agus corparáidí.

(8)

Beidh buntáistí do chách ag baint le tuilleadh trédhearcachta i nochtadh airgeadais ós rud é go mbeidh an tsochaí shibhialta níos rannpháirtí, go mbeidh níos mó eolais ag fostaithe agus nach mbeidh infheisteoirí chomh drogallach céanna roimh rioscaí. Ina theannta sin, bainfidh gnóthais tairbhe as caidreamh níos fearr le geallsealbhóirí, as a dtiocfaidh breis cobhsaíochta, mar aon le rochtain níos éasca ar mhaoiniú de bharr próifíl riosca níos soiléire a bheith acu agus feabhas a bheith ar an gclú atá orthu.

(9)

Sa teachaireacht uaidh an 25 Deireadh Fómhair 2011 dar teideal A renewed EU strategy 2011-14 for Corporate Social Responsibility [Straitéis athnuaite 2011-14 de chuid AE um Fhreagracht Shóisialta Chorparáideach], is é an sainmhíniú a thug an Coimisiún ar an bhfreagracht shóisialta chorparáideach ná freagracht na bhfiontar i leith an tionchair a bhíonn acu ar an tsochaí. Ba cheart cuideachtaí a bheith i gceannas ar an bhfreagracht shóisialta chorparáideach. Is féidir le húdaráis phoiblí ról tacaíochta a bheith acu trí mheascán cliste de bhearta deonacha beartais agus, i gcás inar gá, trí rialáil comhlántach. Is féidir le gnóthais dul níos faide ná comhlíonadh an dlí agus éirí freagrach go sóisialta trí ábhair imní shóisialta nó eiticiúla nó ábhair imní maidir leis an gcomhshaol, an eitic, tomhaltóirí nó cearta an duine a chomhthathú ina straitéis ghnó agus ina gcuid oibríochtaí.

(10)

Ba cheart don phobal a bheith in ann grinnscrúdú a dhéanamh ar ghníomhaíochtaí uile grúpa gnóthas i gcás ina bhfuil cineálacha áirithe eintiteas bunaithe ag an ngrúpa laistigh den Aontas. I gcás grúpaí nach ndéanann gníomhaíochtaí laistigh den Aontas ach trí fhoghnóthais nó trí bhrainsí, ba cheart do na foghnóthais agus do na brainsí sin tuarascáil an mháthairghnóthais deiridh a fhoilsiú agus a dhéanamh inrochtana. Más rud é nach bhfuil an fhaisnéis nó an tuarascáil sin ar fáil nó más rud é nach dtugann an máthairghnóthas deiridh an fhaisnéis uile is gá do na fochuideachtaí nó do na brainsí, ba cheart do na foghnóthais agus do na brainsí tuarascáil maidir le faisnéis faoi cháin ioncaim a tharraingt suas, a fhoilsiú agus a dhéanamh inrochtana ina mbeidh an fhaisnéis uile a fuair siad nó ar tháinig siad uirthi, chomh maith le ráiteas ina léirítear nár chuir a máthairghnóthas deiridh an fhaisnéis is gá ar fáil. Ar chúiseanna a bhaineann le comhréireacht agus le héifeachtacht, áfach, ba cheart go mbeadh an oibleagáid chun an tuarascáil maidir le faisnéis faoi cháin ioncaim a fhoilsiú agus a dhéanamh inrochtana teoranta d’fhoghnóthais mheánmhéide agus d’fhoghnóthais mhóra atá bunaithe san Aontas, agus do bhrainsí ar mhéid inchomparáide arna n-oscailt san Aontas. Ba cheart, dá bhrí sin, raon feidhme Threoir 2013/34/AE a leathnú dá réir sin chuig brainsí arna n-oscailt ag gnóthas i mBallstát ar gnóthas é atá bunaithe lasmuigh den Aontas agus a bhfuil foirm dhlíthiúil aige atá inchomparáide leis na cineálacha gnóthas a liostaítear in Iarscríbhinn I a ghabhann le Treoir 2013/34/AE. Maidir le brainsí a dúnadh amhail dá dtagraítear in Airteagal 37, pointe (k), de Threoir (AE) 2017/1132 ó Pharlaimint na hEorpa agus ón gComhairle (7), níor cheart iad a bheith faoi réir na n-oibleagáidí tuairiscithe a leagtar amach sa Treoir seo a thuilleadh.

(11)

Ba cheart grúpaí ilnáisiúnta, agus i gcás inarb ábhartha, gnóthais saorsheasaimh áirithe, tuarascáil a chur ar fáil don phobal maidir le faisnéis chánach ioncaim i gcás ina dtéann siad thar mhéid áirithe, i dtéarmaí mhéid ioncaim, thar thréimhse dhá bhliain airgeadais as a chéile, ag brath ar ioncam comhdhlúite an ghrúpa nó ar ioncam an ghnóthais shaorsheasaimh. Ar bhealach siméadrach, ba cheart go scoirfeadh an oibleagáid sin d’fheidhm a bheith aici nuair a scoirfidh na hioncaim sin de bheith níos mó ná an méid ábhartha thar thréimhse arb ionann í agus 2 bhliain airgeadais as a chéile. I gcásanna den sórt sin, ba cheart go leanfadh an grúpa ilnáisiúnta nó an gnóthas saorsheasaimh de bheith faoi réir na hoibleagáide tuairisciú a dhéanamh ar an gcéad bhliain airgeadais tar éis na bliana airgeadais a ndeachaigh a ioncam thar an méid ábhartha sin lena linn. Ba cheart grúpa ilnáisiúnta nó gnóthas saorsheasaimh den sórt sin a bheith faoi réir na hoibleagáide tuairiscithe athuair i gcás inar mó a ioncaim ná an méid ábhartha thar thréimhse dhá bhliain airgeadais as a chéile. I bhfianaise raon leathan creataí tuairiscithe airgeadais a bhféadfaidh ráitis airgeadais iad a chomhlíonadh, chun críocha raon feidhme an chur i bhfeidhm a chinneadh, maidir le gnóthais arna rialú le dlí Ballstáit, ba cheart an bhrí chéanna a bheith ag “ioncam” agus atá ag “glanláimhdeachas” agus ba cheart go dtuigfí é i gcomhréir le creat náisiúnta tuairiscithe airgeadais an Bhallstáit sin. Le hAirteagal 43(2), pointe (c) de Threoir 86/635/CEE ón gComhairle (8) agus Airteagal 66(2) de Threoir 91/674/CEE ón gComhairle (9), soláthraítear sainmhínithe maidir le glanláimhdeachas institiúide creidmheasa nó gnóthais árachais, faoi seach, a chinneadh. I gcás gnóthas eile, ba cheart an t-ioncam a mheasúnú i gcomhréir leis an gcreat tuairiscithe airgeadais ar ar a bhonn a ullmhaítear a ráitis airgeadais. Mar sin féin, chun críocha inneachar na tuarascála maidir le faisnéis faoi cháin ioncaim, ba cheart feidhm a bheith ag sainmhíniú difriúil ar “ioncam”.

(12)

D’fhonn tuairisciú dúbailte don earnáil baincéireachta a sheachaint, maidir le máthairghnóthais deiridh agus gnóthais saorsheasaimh atá faoi réir Threoir 2013/36/AE agus a chuireann ina dtuarascáil arna hullmhú i gcomhréir le hAirteagal 89 den Treoir sin a ngníomhaíochtaí ar fad agus, i gcás inarb iomchuí, gníomhaíochtaí uile a ngnóthas cleamhnaithe a cuireadh san áireamh ina ráitis airgeadais chomhdhlúite, lena n-áirítear gníomhaíochtaí nach bhfuil faoi réir fhorálacha Chuid 3, Teideal I, Caibidil 2, de Rialachán (AE) Uimh. 575/2013 ó Pharlaimint na hEorpa agus ón gComhairle (10), ba cheart na gnóthais sin a dhíolmhú ó na ceanglais tuairiscithe a leagtar amach sa Treoir seo.

(13)

Sa tuarascáil maidir le faisnéis faoi cháin ioncaim, ba cheart go n-áireofaí, i gcás inarb infheidhme, liosta de na foghnóthais uile, i ndáil leis an mbliain airgeadais ábhartha, atá bunaithe san Aontas nó i ndlínsí cánach a áirítear in Iarscríbhinn I agus, i gcás inarb infheidhme, in Iarscríbhinn II a ghabhann leis an leagan ábhartha de na conclúidí ón gComhairle maidir le liosta athbhreithnithe an Aontais de dhlínsí neamh-chomhoibríocha chun críoch cánach. Chun cruthú ualaigh riaracháin a sheachaint, ba cheart don mháthairghnóthas deiridh a bheith in ann brath ar liosta na bhfoghnóthas a áirítear i ráitis comhdhlúite airgeadais an mháthairghnóthais deiridh. Sa tuarascáil maidir le faisnéis faoi cháin ioncaim, ba cheart faisnéis a chur ar fáil freisin maidir le gníomhaíochtaí uile na ngnóthas cleamhnaithe uile de chuid an ghrúpa agus iad comhdhlúite i ráitis airgeadais an mháthairghnóthas deiridh nó, ag brath ar na himthosca, maidir le gníomhaíochtaí uile an ghnóthais saorsheasaimh. Ba cheart an fhaisnéis a theorannú don mhéid a bhfuil gá leis chun gur féidir grinnscrúdú poiblí éifeachtach a dhéanamh, chun a áirithiú nach dtiocfadh ann do rioscaí nó míbhuntáistí díréireacha, ó thaobh iomaíochais nó míléirithe de, i dtaca leis na gnóthais lena mbaineann mar gheall ar an nochtadh. Ba cheart an tuarascáil maidir le faisnéis faoi cháin ioncaim a dhéanamh inrochtana tráth nach déanaí ná 12 mhí tar éis dháta an chláir comhardaithe. I dtaca leis an tuarascáil maidir le faisnéis faoi cháin ioncaim, níor cheart feidhm a bheith ag aon tréimhsí níos giorra chun ráitis airgeadais a fhoilsiú. Ní dhéanann na forálacha a tugadh isteach leis an Treoir seo difear d’fhorálacha Threoir 2013/34/AE maidir le ráitis airgeadais bhliantúla agus ráitis airgeadais chomhdhlúite.

(14)

Chun cruthú ualaigh riaracháin a sheachaint, ba cheart gnóthais a bheith i dteideal an fhaisnéis a chur i láthair ar bhonn na dtreoracha tuairiscithe a leagtar síos i Roinn III, Cuid B agus Cuid C d’Iarscríbhinn III a ghabhann le Treoir 2011/16/AE (11) ón gComhairle le linn dóibh tuarascáil maidir le faisnéis faoi cháin ioncaim a ullmhú i gcomhréir leis an Treoir seo. Ba cheart a shonrú sa tuarascáil maidir le faisnéis faoi cháin ioncaim cé an creat tuairiscithe a úsáideadh. Sa bhreis air sin, d’fhéadfadh insint fhoriomlán a bheith sa tuarascáil maidir le faisnéis faoi cháin ioncaim ina dtugtar mínithe i gcás ina mbeadh neamhréireanna ábhartha ann ar leibhéal an ghrúpa idir méideanna na cánach fabhraithe agus méideanna na cánach íoctha, lena gcuirtear san áireamh méideanna comhfhreagracha a bhaineann le blianta airgeadais roimhe sin.

(15)

Tá sé tábhachtach a airithiú go bhfuil na sonraí inchomparáide. Chun na críche sin, ba cheart cumhachtaí cur chun feidhme a thabhairt don Choimisiún chun teimpléad coiteann agus formáidí tuairiscithe leictreonacha, ar cheart iad a bheith meaisín-inléite, a leagan síos, chun an tuarascáil faoi cháin ioncaim a chur i láthair de bhun na Treorach seo. Agus an teimpléad sin agus na formáidí tuairiscithe sin á leagan síos, ba cheart don Choimisiún aird a thabhairt ar an dul chun cinn a rinneadh i réimse an digitithe agus na hinrochtaineachta ar fhaisnéis arna foilsiú ag gnóthais, go háirithe maidir le forbairt an phointe rochtana aonair Eorpaigh mar a mholtar sa teachtaireacht uaidh an 24 Meán Fómhair 2020 dar teideal ‘A Capital Markets Union for people and businesses - new action plan’ [Aontas na Margaí Caipitil: Aontas do Dhaoine agus do Ghnólachtaí – plean gníomhaíochta nua] Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (12).

(16)

Chun a áirithiú gurb ann do leibhéal leordhóthanach mionsonraí chun a chur ar chumas saoránach measúnú níos fearr a dhéanamh ar rannchuidiú gnóthas ilnáisiúnta do leas na sochaí i ngach Ballstát, ba cheart an fhaisnéis sin a mhiondealú de réir Ballstáit. Thairis sin, ba cheart ardleibhéal mionsonraí a bheith ann freisin san fhaisnéis a bhaineann le hoibríochtaí gnóthas ilnáisiúnta maidir le dlínsí cánach áirithe tríú tír a bhfuil dúshláin ar leith ag baint leo. I gcás na n-oibríochtaí tríú tír eile go léir, ba cheart an fhaisnéis a thabhairt ar bhonn comhiomlán, ach amháin más mian leis an ngnóthas faisnéis níos mionsonraithe a chur i láthair.

(17)

Maidir le dlínsí cánach áirithe, ba cheart leibhéal ard sonraí a thaispeáint. Ba cheart, leis an tuarascáil maidir le faisnéis faoi cháin ioncaim, an fhaisnéis a nochtadh ar leithligh le haghaidh gach dlínse a áirítear sna hIarscríbhinní a ghabhann leis na conclúidí ón gComhairle maidir le liosta athbhreithnithe an Aontais de dhlínsí neamh-chomhoibríocha chun críoch cánach (13), mar aon leis na nuashonruithe a dhéanfar orthu ina dhiaidh sin a fhormheastar go sonrach faoi dhó sa bhliain, go hiondúil i mí Feabhra agus i mí Dheireadh Fómhair, agus a fhoilsítear i sraith C do Iris Oifigiúil an Aontais Eorpaigh. Cuireann Iarscríbhinn I a ghabhann leis na conclúidí ón gComhairle “Liosta an Aontais de dhlínsí neamh-chomhoibríocha chun críoch cánach” i láthair agus cuireann Iarscríbhinn II “Staid na himeartha maidir leis an gcomhar leis an Aontas i ndáil le gealltanais a thug dlínsí comhoibríocha chun prionsabail an dea-rialachais cánach a chur chun feidhme” i láthair. Maidir le hIarscríbhinn I, is iad na dlínsí ba cheart a bhreithniú na cinn a bhí liostaithe an 1 Márta den bhliain airgeadais a bhfuil an tuarascáil maidir le faisnéis faoi cháin ioncaim le tarraingt suas ina leith. Maidir le hIarscríbhinn II, is iad na dlínsí ba cheart a bhreithniú na cinn a luadh san Iarscríbhinn sin an 1 Márta den bhliain airgeadais a bhfuil an tuarascáil maidir le faisnéis faoi cháin ioncaim le tarraingt suas ina leith agus an 1 Márta den bhliain airgeadais roimhe sin.

(18)

D’fhéadfadh nochtadh láithreach na sonraí atá le háireamh sa tuarascáil maidir le faisnéis faoi cháin ioncaim dochar tromchúiseach a dhéanamh do staid tráchtála gnóthais, i gcásanna áirithe. Dá bhrí sin, ba cheart go mbeadh an fhéidearthacht ag na Ballstáit ligean do ghnóthais nochtadh míreanna sonracha faisnéise a chur siar ar feadh líon teoranta blianta, ar choinníoll go nochtfaidh siad go soiléir gurb ann don chur siar sin agus go dtabharfaidh siad míniú réasúnaithe ina leith, maille le bunús an réasúnaithe sin, sa tuarascáil. Ba cheart an fhaisnéis a fhágann gnóthais ar lár a nochtadh i dtuarascáil ina dhiaidh sin. Níor cheart faisnéis a bhaineann le dlínsí cánach a áirítear in Iarscríbhinní I agus II a ghabhann leis na conclúidí ón gComhairle maidir le liosta athbhreithnithe an Aontais de dhlínsí neamh-chomhoibríocha chun críoch cánach a fhágáil ar lár riamh.

(19)

Chun trédhearcacht agus freagracht chorparáideach i leith infheisteoirí, creidiúnaithe, tríú páirtithe eile agus an pobal i gcoitinne a neartú, agus chun rialachas iomchuí a áirithiú, ba cheart comhfhreagracht a bheith ar chomhaltaí chomhlachtaí riaracháin, bainistíochta agus maoirseachta an mháthairghnóthais deiridh nó an ghnóthais saorsheasaimh atá bunaithe laistigh den Aontas agus ar a bhfuil an oibleagáid tuarascáil maidir le faisnéis faoi cháin ioncaim a tharraingt suas, a fhoilsiú agus a dhéanamh inrochtana, ba cheart comhfhreagracht a bheith orthu maidir le comhlíonadh na n-oibleagáidí tuairiscithe faoin Treoir seo a áirithiú. Ós rud é go bhféadfadh sé gur eolas teoranta a bheadh ag comhaltaí chomhlachtaí riaracháin, bainistíochta agus maoirseachta na bhfoghnóthas atá bunaithe laistigh den Aontas agus atá faoi rialú ag máthairghnóthas deiridh atá bunaithe lasmuigh den Aontas, nó ós rud é go bhféadfadh sé gur eolas teoranta a bheadh ag an duine sin nó ag na daoine sin ar a bhfuil sé de chúram na foirmiúlachtaí maidir le nochtadh a dhéanamh thar ceann an bhrainse, ar eolas teoranta é faoi ábhar na tuarascála maidir le faisnéis faoi cháin ioncaim arna hullmhú ag an máthairghnóthas deiridh, nó ós rud é go bhféadfadh sé gur cumas teoranta a bheadh acu teacht ar fhaisnéis den sórt sin nó ar thuarascáil den sórt sin ón máthairghnóthas nó ón ngnóthas saorsheasaimh, ba cheart go gcuimseofaí leis an bhfreagracht atá ar na baill sin nó ar na daoine sin go n-áiritheofaí, chomh fada agus is eol dóibh agus chomh maith agus is féidir leo, go ndearnadh an tuarascáil maidir le faisnéis faoi cháin ioncaim a tharraingt suas agus a fhoilsiú ar bhealach atá comhsheasmhach leis an Treoir seo nó go ndearna an foghnóthas nó an brainse an fhaisnéis ar fad atá faoina sheilbh, nó atá faighte aige, a tharraingt suas, a fhoilsiú agus a dhéanamh inrochtana i gcomhréir leis an Treoir seo. I gcás ina bhfuil an fhaisnéis nó an tuarascáil neamhiomlán, ba cheart go gcumhdófaí leis an bhfreagracht atá ar na baill sin nó ar na daoine sin ráiteas a fhoilsiú lena léirítear nár chuir an máthairghnóthas deiridh nó an gnóthas saorsheasaimh an fhaisnéis riachtanach ar fáil.

(20)

Chun a áirithiú go bhfuil an pobal ar an eolas maidir le raon feidhme na n-oibleagáidí tuairiscithe a tugadh isteach i dTreoir 2013/34/AE leis an dTreoir seo, agus maidir le comhlíonadh na n-oibelagáídí sin, ba cheart do na Ballstáit a cheangal ar iniúchóirí reachtúla agus ar ghnólachtaí iniúchóireachta a chur in iúl an raibh ceangal ar ghnóthas tuarascáil a fhoilsiú maidir le faisnéis faoi cháin ioncaim, agus más amhlaidh go raibh, ar foilsíodh an tuarascáil sin.

(21)

Maidir leis na hoibleagáidí atá ar na Ballstáit foráil a dhéanamh maidir le pionóis agus na bearta uile is gá a dhéanamh chun a áirithiú go gcuirfear na pionóis sin i bhfeidhm de bhun Threoir 2013/34/AE, beidh feidhm acu maidir le sáruithe ar na forálacha náisiúnta a mhéid a bhaineann le faisnéis faoi cháin ioncaim a bheith á nochtadh ag gnóthais agus brainsí áirithe arna nglacadh de bhun na Treorach seo.

(22)

Féachtar sa Treoir seo le trédhearcacht chorparáideach agus trédhearcacht agus grinnscrúdú poiblí maidir le faisnéis faoi cháin chorparáide a mhéadú trí oiriúnú a dhéanamh ar an gcreat dlí atá ann cheana i dtaca leis na hoibleagáidí a chuirtear ar chuideachtaí agus ar ghnólachtaí i ndáil le tuarascálacha a fhoilsiú, chun leasanna na gcomhaltaí agus leasanna daoine eile a chosaint, de réir bhrí Airteagal 50(2), pointe (g), den Chonradh ar Fheidhmiú an Aontais Eorpaigh (CFAE). Mar a dhearbhaigh an Chúirt Bhreithiúnais, go háirithe, i gCás C-97/96 Verband deutscher Daihatsu-Händler (14), déantar tagairt in Airteagal 50(2), pointe(g), CFAE don ghá atá le leasanna “daoine eile” a chosaint go ginearálta, gan catagóirí a thagann faoi raon feidhme an téarma sin a shainiú nó a eisiamh. Dá bhrí sin, níl an téarma “daoine eile” teoranta d’infheisteoirí agus do chreidiúnaithe amháin, agus cuimsítear leis tríú páirtithe leasmhara eile, lena n-áirítear iomaitheoirí agus an pobal i gcoitinne. Thairis sin, an cuspóir chun an tsaoirse bunaíochta a bhaint amach, a shanntar do na hinstitiúidí i dtéarmaí an-leathan le hAirteagal 50(1) CFAE, ní féidir é a theorannú le forálacha Airteagal 50(2) CFAE. Ós rud é nach mbaineann an Treoir seo ach le hoibleagáidí chun tuarascálacha maidir le faisnéis faoi cháin ioncaim a fhoilsiú, agus ós rud é nach mbaineann sí le comhchuibhiú cánach, is é Airteagal 50(1) CFAE an bunús dlí iomchuí.

(23)

Chun feidhmiú iomlán an mhargaidh inmheánaigh agus cothroime iomaíochta idir gnóthais ilnáisiúnta Aontais agus gnóthais ilnáisiúnta tríú tír a áirithiú, ba cheart don Choimisiún leanúint de bheith ag iniúchadh na bhféidearthachtaí chun cothroime agus trédhearcacht cánach a mhéadú. Ba cheart don Choimisiún féachaint go háirithe, laistigh den chlásal athbhreithnithe, an gcuirfeadh, inter alia, dí-chomhiomlánú iomlán le héifeachtacht na Treorach seo.

(24)

Ós rud é nach féidir leis na Ballstáit cuspóir na Treorach seo a ghnóthú go leordhóthanach agus, de bharr a héifeachta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(25)

Leis an Treoir seo, freagraítear ar na hábhair imní a chuir na páirtithe leasmhara in iúl maidir leis an ngá atá le dul i ngleic le saobhadh sa mhargadh inmheánach gan iomaíochas an Aontais a chur i mbaol. Níor cheart ualach riaracháin míchuí a chruthú do ghnóthais léi. Ar an iomlán, faoi chuimsiú na Treorach seo, tá méid na faisnéise atá le nochtadh comhréireach leis na cuspóirí i dtaca le trédhearcacht chorparáideach agus grinnscrúdú poiblí a mhéadú. Sa Treoir seo, urramaítear, dá bhrí sin, na cearta bunúsacha agus comhlíontar léi na prionsabail a aithnítear go háirithe i gCairt um Chearta Bunúsacha an Aontais Eorpaigh.

(26)

I gcomhréir le Dearbhú Comhpháirteach Polaitiúil an 28 Meán Fómhair 2011 ó na Ballstáit agus ón gCoimisiún maidir le doiciméid mhíniúcháin, ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur leis an bhfógra maidir lena mbearta trasuite, ar doiciméid iad lena mínítear an gaol idir codanna de threoir agus páirteanna comhfhreagracha na n-ionstraimí náisiúnta trasuite. I ndáil leis an Treoir seo, measann an reachtóir go bhfuil údar cuí le doiciméid den sórt sin a tharchur.

(27)

Ba cheart, dá bhrí sin, Treoir 2013/34/AE a leasú dá réir sin,